بقلم اسلام احمد 1

النور لما ضرب في وشة، اتقطع نفسه ووقف مكانه زي المصدوم. عينه زغللت، وبصلي بذهول وهو شايفني قاعدة بكامل هدومي على الكرسي، ومربعة إيدي، وببص له بنظرة حادة زي السيف.

حاول يستوعب الموقف، وتردد ثواني، وبعدين حاول يلبس ثوب الثقة والهدوء الكداب اللي بيمثل بيه عليا دايماً. اتكلم بصوت واطي ومبحوح عشان يبين إنه خايف يصصحيني:

“إيه ده؟ أنتِ صاحية يا بنت الحلال؟ ولعتِ النور فجأة ليه كدة؟ خضيتيني!”

رديت عليه بنبرة هادية جداً، بس كانت أتقل من الرصاص:

“كنت فين يا شهريار؟”

اتربك، ووضعه اتغير، حاول يبتسم ابتسامة باهتة ويقول:

“كنت فين يعني؟ نزلت أرمي الزبالة وكنت بشوف حاجة في مدخل العمارة كده..”

ضحكت ضحكة مكسورة مليانة تريقة وقرفت:

“ترمية الزبالة الساعة 3 الصبح وبالمفتاح اللي بيتسحب؟ وبترمي الزبالة في شقة سلفتي اللي فتحت لك الباب ودخلت عندها بقالك ساعة إلا ربع؟!”

وشه اتغير تماماً، ألوانه اتخطفت، والدم هرب من عروقه. حاول يتدارك الموقف بسرعة وبدأ يعلي صوته سنة عشان يغلوش على كدبه:

“أنتِ بتراقبيني؟ وبعدين أنتِ اتجننتِ رسمي ولا إيه؟ افتراء ده ولا تخاريف أنصاص الليالي؟”

قمت وقفت بثبات، وقربت منه بخطوات واثقة، وواجهته في وشة:

“أنا مش بتخايل، ولا بتخارف! أنا شفت تليفونك لما نور بأسما الساعة 2، وشفتك وأنت بتكتِم الصوت وتتسحب زي الحرامية وتخرج من الأوضة بغير ما تنطق حرف! ومشيت وراك وشفك وأنت بتفتح باب شقتها بالمفتاح وتدخل! تحب أقولك كمان كانت لابسة إيه وهي بتفتح لك؟ ولا تحب أقولك كان في إيه طارئ محتاج ساعة إلا ربع جوة الشقة في نص الليل؟!”

جوزي اتهز هزة جامدة، مكنش عامل حسابه إن كل خطواته كانت مكشوفة بالدقة دي. مالقاش مخرج غير إنه يقلب الترابيزة ويتحول للهجوم، الأسلوب التقليدي لأي حد مزنوق في غلطه:

“أها! بقى كدة؟ بتمشي ورايا وتسوري عليا في العمارة؟ بقيتي تصرفي تصرفات الجواسيس؟ ماشي يا هانم! أه نزلت لها! نزلت لها عشان الست كانت بتعيط وميتة من الخوف، ابنها الصغير سخن ومولع نار وجاتله تشنجات، وماكنتش عارفة تتصرف ولا عارفة تعمل إيه، وحست إن الولد بيموت في إيدها، اتصلت بيا استغاثة! أعمل إيه يعني؟ أسيب ابن أخويا بيموت وأقول عشان مراتي حنبلية وبتغير؟! أنزل أساعدها وأجيب لها دواء ولا أسيب الست تتلطم لوحدها في نص الليل؟”