بقلم صافي هاني 2

بعد ما الباب اتفقل في وش حماتي وندى، البيت بقى ساكت بشكل يرعب. السكون ده كان أتقل من الزعيق اللي كان شغال من شوية. طارق كان واقف ورا الباب، ظهره لينا ونفسه عالي، إيده كانت بتترعش وهو ماسك الأوكرة. عمر ابني كان لسه لابد في حضني، ماسك في بلوزتي بفركشة وحاطط راسة في بطني. طبطبت عليه وكنت بحاول أهدي ضربات قلبي عشان ما يحسش بخوفي أو غضبي. أول حاجة عملتها، أخدت عمر من إيده ودخلت بيه المطبخ. فتحت الأكياس اللي كنت جايباها معايا. طلعت الجبنة البيضا، والزبادي، وعملت له ساندوتشين ومسكت إيده: * كل يا حبيبي.. كل وما تخافش من حاجة طول ما أنا جنبك. عمر بصلي بعيون مليانة دموع وسألني بصوت واطي ومكسور: * ماما.. هو أنا فعلاً تقيل عليهم؟ هو أنا وحش؟ الكلمة دي قطعت قلبي حتت. اتمنيت في اللحظة دي لو أرجع أطلع بره البيت وأمسك ندى وحماتي أرد لهم الوجع ده ضعف. قعدت على ركبي قدامه وبسته في رسه: * إنت أحسن حاجة في حياتي يا عمر، إنت سيدهم وسيد البيت ده كله. البيت ده بتاعك إنت، ومحدش يقدر يمس منك شعرة وأنا عايشة. طارق دخل المطبخ بالبطيء، وشه كان شاحب كأنه مريض، مش قادر يحط عينه في عيني. قرب من عمر وقعد على ركبه هو كمان، ومد إيده يلمس شعر عمر، بس عمر رَجَع لورا خطوة واستخبى ورايا. الحركة دي كانت كف تاني على وش طارق. طارق غمض عينه بألم وقال بصوت مكسور: * أنا آسف يا عمر.. سامحني يا بني، أنا ماكنتش اعرف.. والله ما كنت اعرف إنهم بالندالة دي. بصيت لطارق بكل برود وقلت له: * الأسف مش ليا ولا لعمر يا طارق. الأسف ده للغفلة اللي كنت فيها. أسبوعين كاملين وابنك هنا بيتهان وبيتاكل أكل الكلاب وسبت الفلوس والأكل اللي أنا طافحة الدم عشان أجيبه عشان أختك وأمي ياكلوه ويتأمروا عليك وعليا؟ طارق مسك رتسه بكتف إيديه وقال بصوت طالع بالعافية: * هبة.. أنا مذهول، أنا مش قادر أستوعب إن أمي اللي مربياني تعمل كده! التسجيل ده نزل عليا زي الصاعقة.. دي كانت بتخطط عشان تاخد البيت منك وتكتبه لندى! أنا كنت بالنسبة لهم مجرد كوبري! رديت عليه بثبات: * وأنا مش هسمح للكوبري ده يتهد على دماغي ودماغ ابني. إنت دلوقتي قدام الاختيار يا طارق.. أنا مش هجبرك تقطع أمك، ده يرجع لضميرك، بس بيتي وابني خط أحمر. رجلهم ما تطأش البيت ده تاني، وأي قرش يدخل بيتنا من هنا ورايح مش هيطلع منه مليم ليهم. في اللحظة دي، الموبايل في جيب طارق بدأ يرن. كانت ندى. طارق بص للموبايل بغضب، فتح السبيكر وحطه على الترابيزة عشان أسمع. صوت ندى كان طالع بيصرخ وبيعيط من الناحية التانية: * الحقنا يا طارق! أمك وقعت في الشارع ومغمة عليها من الصدمة لما طردتنا! إنت إزاي تعمل فينا كده عشان حتة عيل وواحدة غريبة؟ تبيع أمك وأختك اللي مالهمش غيرك؟ تعال خدوها على المستشفى بسرعة! أنا فضلت ساكتة وبصيت لطارق أشوف رد فعله.. هل هيضعف ويرجع للتمثيلية اللي حافظها من سنين؟ طارق أخد نفس عميق، ولأول مرة في حياته، كان صوته قاسي وقوي وهو بيرد على أخته: * التسجيل معايا يا ندى.. التسجيل اللي إنتي سجلتيه بغبائك معايا على الموبايل. أمي مش مغمى عليها ولا حاجة، دي بتعمل نمرة عشان أرجع أستسمحكم. اسمعيني كويس.. المستشفى اللي بتقولي عليها دي، لو هي فعلاً تعبانة، خديها وروحي بيها من فلوس الجوايش اللي كنتوا بتخططوا تطلعوها على قفا هبة وعمر. رجلي مش هتطأ عندكم تاني، والبيت ده مش بتاعكم، وحسابي معاكم على الاستغفال ده لسّه ما خلصش! قفل الخط في وشها قبل ما تنطق بكلمة. الليل عدى أتقل من الجبال. طارق قعد في الصالة لوحده لحد الصبح، مش قادر ينام، وأنا أخدت عمر في حضني ونمنا فوق. كنت حاسة إن الجرح كبر، بس في نفس الوقت حاسة إن الحق ظهر وأخيراً خدت حقي وحق ابني. تاني يوم الصبح، الساعة كانت حوالي تمانية، سمعنا صوت خبط جامد على باب الشارع بره. عمر صحي خايف، مسكت إيده ونزلنا سوا. طارق فتح الباب، وكانت المفاجأة.. ماكنتش حماتي ولا ندى، ده كان جوز ندى (حسين) ومعه عم طارق الكبيرة في العيلة (الحاج متولي)، جايين ومعاهم وجوه جادة وجاية "تقعد قعدة عرب"! حسين دخل وهو باصص لطارق بغضب وقال: * بقى إنت تطرد حماتك وأختك في الشارع يا طارق عشان مرتك سايقاك؟ العيلة كلها بتتكلم عن اللي عملته أختك مبارح! أنا نزلت من على السلم بكل هدوء ووقفت جنب طارق، وقلت للحاج متولي: * خطوة عزيزة يا حاج متولي.. اتفضل ادخل، وعشان تبقى قعدة عرب صح، اسمع الأول بعينك وودنك، وبعدين احكم مين اللي يطرد ومين اللي يترفع عليه القضايا كمان! طلعت الموبايل وشغلت التسجيل قدام الحاج متولي وحسين جوز ندى. الصمت في الصالة كان يذبح.. وش حسين بقى في الأرض من كسفة أفعال مراته وأمها، والحاج متولي ضرب عصايته في الأرض بغضب شديد وهو باصص لحسين وطارق: * بقى الكلام ده يطلع من أختك وأمك؟ عايزين تسرقوا البيت وتجوعوا العيل؟ الحاج متولي بص لطارق وقال له: * إنت صح يا طارق.. اللي يبيع ابنه ومراته عشان ناس بتستغفله، ما يبقاش راجل. والبيت ده يفضل مقفول في وشهم لحد ما يتعلموا الأصول. حسين جوز ندى قعد ومش عارف يودي وشه فين، وقال بصوت واطي: * أنا أسف يا طارق.. أنا والله ما كنت اعرف إن ندى وأمها بيعملوا كدة من ورايا.. أنا هاخد ندى ومربيها من جديد في بيتي، والبيت ده مش هيشوفوا عتبته تاني. في اليوم ده، حسيت إن كرامة ابني ورأسي اترفعت للسما. طارق اتعلم الدرس الأكبر في حياته، وعايزة أقولكم إن السكوت على الحق ضعف، لكن الوقوف في وش الظلم حتى لو من أقرب الناس هو اللي بيحمي بيتك ولادك. عليه أفضل الصلاة والسلام. عدى شهر كامل على اليوم ده.. شهر كان فيه هدوء ما عشتهوش من سنين. طارق اتغير تماماً، بقى شخص تاني حريص على بيته وابنه فوق أي شيء. عرف إن السكوت على ظلم أقرب الناس مش بر، ده غفلة وضياع للحقوق. بقى يركز في شغله وفي بيته، وبيحاول بكل الطرق يعوّض عمر عن الليلة الصعبة اللي عاشها، وعن كل لحظة تحسس فيها إن مالهوش قيمة أو إن وجوده تقيل. عمر رجعت له ضحكته الحلوة، ونست الأيام دي خالص لما شاف أمه وأبوه وافقين في ظهره وضهر بعض، وبقى يلعب في جنينة البيت بالكرة براحته من غير ما يخاف إن حد يصرخ في وشه أو يرمي له نص بطاطساية مسلوقة باردة في طبق بلاستيك. أما ندى وحماتي، فحسين جوز ندى أخد موقف حاسم جداً بعد قعدة العرب، وعلم أخت طارق إن البيت والأصول خط أحمر، وحماتي فاقت على حقيقة إنها خسرت ابنها وابن ابنها بسبب طمعها وتدبيرها من ورا الضهر. حاولوا يبعتوا أطراف تانية يترجوا طارق عشان نرجع نفتح البيت لهم، بس طارق كان حسابه حاسم: * "اللي يهين ابني ويستغفلني في بيتي، مالهوش مكان في حياتي تاني.. صلة الرحم بالواجب والسلام، لكن دخول بيتي وخطط الاستغلال انتهت للأبد." أنا قفلت بيتي في الريف، وبقينا ننزل فيه إحنا التلاتة بس في الإجازات.. ندخل ونسلم على الشجر والجنينة ونقعد في هدوء ونظافة وراحة بال. اتعلمت من التجربة دي إن المظلوم لو ما وقفش ودافع عن حقه وعن ولاده، محدش هيقف له. وإن البيوت ما تتبنيش بالخوف والمجاملة على حساب كرامة عيالنا، البيوت تتبنى بالحق والقوة والحدود الحازمة. عليه أفضل الصلاة والسلام. ودي كانت نهاية قصتنا.. بشكركم جداً على متابعتكم وتشجيعكم الدايم في حكايات صافي هاني، وأشوفكم في قصة جديدة وحكاية جديدة فيها عبرة وموقف من واقع الحياة! ❤️

مقالات ذات صلة

بقلم روماني مكرم 1

” هي دي اللي أنت متجوزها “

اطلعي بره وخودي ولادك معاكي

جوزي بعتلي 150 الف ج 5

اللحظات الأخيرة

اخوات جوزي ج2

اترك تعليقاً إلغاء الرد