روماني مكرم 2
وقعت على الأرض، الرمل والتراب اتلم على هدومي. حاسة إن الدنيا أخدت مني كل حاجة في يوم واحد: جوزي، بناتي، شرف عيلتي، وكرامتي.
ساعات مرت وأنا مش عارفة أروح فين. رجلي أخدتني لبيت أمي.. البيت اللي كان مصدر الأمان بقى زي المقبرة. فتحت الباب بالمفتاح ودخلت. الشقة كانت فاضية، كراكيب رمياها الشرطة لما دخلوا يفتشوا، أوراق مرمية على الأرض، وصورة أمي وأبويا المتوفي متعلقة على الحيطة.
قعدت على الأرض في صالة بيت أمي، وبصيت للصورة وصرخت: “ليه يا أمي؟! ليه عملتي فيا كدة؟! أنا كنت بنتك الحبيبة اللي بتسمع كلامك! ليه تبيعي بيتي عشان تسندي حسام وسمر؟! عملتلك إيه عشان تدمريني بالمنظر ده؟!”
التليفون رن في إيدي.. كان رقم غريب. رديت بصوت مهدود: “أيوة..”
صوت راجل جاد قال: ” الأستاذة أمل؟ أنا الأستاذ مجدي محامي العيلة.. أنا جالي إخطار إن والدتك والأستاذ حسام ومدام سمر معروضين على نيابة التجمع الصبح في قضية السرقة وخيانة الأمانة. والدتك طلبتني وقالتلي أكلمك عشان تيجي تحضري معاهم وتدفعي كفالة أو تقدمي تنازل باسم جوزك!”
ضحكت ضحكة هستيرية، ضحكة طالعة من قاع الوجع: “أحضر معاهم؟! أقدم تنازل؟! أنت عارف أهلي عملوا إيه يا أستاذ؟! أهلي سرقوا جوزي ودمروا بيتي وشردوا بناتي وجوزي طلقني بسببه!”
المحامي سكت شوية وبعدين قال بأسى: “أنا فاهم موقفك يا مدام أمل.. بس والدتك ست كبيرة، وضغطها مرفوع جداً في الحجز، والدكتور تم استدعاؤه ليها مرتين للنيابة، ولو اتحبست احتياطي على ذمة القضية ممكن تجيلها جلطة وتفوت فيها. حسام وسمر هما المحركين للقصة، بس والدتك متهمة أساسية لأنها المستأمنة.”
الكلمات نزلت تقيلة على قلبي. أمي.. أمي اللي شالتني تسع شهور، أمي اللي مهما عملت تفضل أمي.. هسيبها تموت في السجن؟ ولا هقف مع الراجل اللي اترميت في الشارع بسببه ولغالي حياتي؟
في اليوم التالي، الصبح بدري، كنت واقفة قدام سرايا النيابة. عينيا كانت زي جمر النار من كتر العياط. النيابة كانت زحمة، والعساكر واقفين، وشفت القوة وهي داخلة والمتهمين متكلبشين في بعض.
حسام وسمر وطارق كانوا في الأوسط، وأمي كانت ماشية في آخر السلسلة، العكاز في إيد والإيد التانية متكلبشة في يد عسكري! ووشها كان أصفر زي الموت، عينيا جات في عينها.. شفت في عين أمي كسرة ورعب عمرهم ما دخلوا بيتنا. أول ما شافتني، شفايفها اترعش وقالت بصوت ملوش أثر: “أمل.. سامحيني يا بنتي.. سامحيني يا أمل.”
