بقلم روماني مكرم 1

وكأن عمري كله كان كذبة كبيرة.

وكأني مكنتش أخته، بل مجرد أداة استخدموها ولما خلصت رمواها.

بس صباح مخلصتش كلام:

— “المحامي بعت لك رسالة. قراءة الوصية وتصفية الشغل هتكون النهاردة الساعة أربعة العصر في مكتبه في **السيدة زينب**. تعالي عشان توقعي تنازل عن حصتك الوهمية… وإلا هرميكي في الشارع من الشقة اللي قاعدة فيها، لأنها للمعلومة، متسجلة باسم الشركة.”

وقفت السكة في وشي.

فضلت قاعدة في الضلمة.

بصيت لصورة سيد اللي متعلقة قدامي.

كان حاطط إيده على كتفي وبيبتسم، وأنا بصلة له بكل فخر.

هل كان بيخطط لكل ده؟ هل كان عارف إن مراته هترميني في الشارع أول ما يغمض عينيه؟

قمت ببطء.

دخلت الحمام وغسلت وشي بمية تلج.

اللي بصت لي في المراية دي مكنتش الأخت المكسورة اللي قضت الليل بتعيط.

دي كانت واحدة فاقت وعرفت إنها اتزنقت في الزاوية، ومبقاش عندها أي حاجة تخسرها.

فتحت دولابي.

طنشّت الهدوم السودة الواسعة اللي كنت ناوية ألبسها عشان الحداد.

وسحبت بدلة رمادي رسمية حادة جداً… البدلة اللي كنت بظبط بيها الصفقات وأنقذ الشركة من الإفلاس في الاجتماعات المقفولة.

لميت شعري ورفعته لفوق بقوة.

لو صباح فاكرة إنها عزمت “الموظفة الضعيفة” عشان توقّع استقالتها… تبقى غلطانة.

أنا اللي عملت سيد… وأنا الوحيدة اللي أقدر أهدّ المعبد فوق دماغ الكل.

الساعة أربعة العصر، زقيت باب مكتب المحامي **”الأستاذ فرج”**.

كانت ريحة القهوة المرة مالية المكان.

صباح كانت قاعدة في صدر الترابيزة، لابسة نظارة شمس سودة مش مدارية ابتسامة النصر على شفايفها. وجنبها أخوها **”جمعة”**، بيبص لي وكأني حشرة.

المحامي فرج ابتسم بارتباك باين أوي أول ما شافني:

— “اتفضلي يا أستاذة نوال… اتفضلي اقعدي.”

قعدت وشي لوش صباح. منزلتش عينيا من عينها لحظة.

صباح أتاففت وبصت في ساعتها الألماس:

— “يا أستاذ فرج، خلينا نخلص. إديها أوراق التنازل عن ادعاءاتها في الشركة، واقرا الوصية عشان نعرف رأسنا من رجلينا.”

المحامي مسح نقط عرق نازلة من على جبهته… كان متوتر بشكل مش طبيعي.

— “يا سيدة صباح… الأوراق اللي سابها المرحوم سيد… معقدة شوية.”

صباح رفعت حاجبها:

— “معقدة إزاي يعني؟ كل حاجة متسجلة باسمه، وبتؤول ليا بصفتي الوريثة الوحيدة وزوجته، ولا أنا غلطانة؟”