بقلم روماني مكرم2
— “الأمر صادر من النيابة العامة يا كمال باشا.. وبناءً على بلاغ رسمي اتقدم من ساعة واحدة بس، مرفق معاه تسجيلات وأوراق بتثبت إنك موجود هنا عشان تجبر الورثة يوقعوا على تنازلات تحت التهديد، وإن سيد عبد الصمد مات مقتول وأنتوا بتتستروا على القاتل عشان تقسموا التركة بينكم!”
قبضت على أطراف الترابيزة.
بلاغ؟ من ساعة واحدة؟!
صباح وجمعة مالحقوش يخرجوا من المنطقة أساسًا! هل كانوا مجهزين البلاغ ده من الأول كارت ضغط؟ ولا فيه حد تاني كان بيلعب بينا كلنا من ورا الستار؟
التفتُّ للضابط وقلت بصوت محدد وحاد، مستجمعة كل ما تبقى لي من قوة:
— “حضرتك فاهم الموضوع غلط يا فندم. أنا نوال عبد الصمد.. أخت المرحوم والشريكة الفعلية في الشركة. محدش أجبر حد على حاجة، وصباح حرم أخويا كانت هنا بتصفي التركة معايا بشكل ودي…”
قاطعني الرائد هشام بنظرة حادة جمدت الكلمات في حلقي:
— “البلاغ مش من صباح يا أستاذة نوال.. البلاغ متقدم من المحامي الخاص بـ ‘شركة الكارما’.. الشركة اللي يملكها كمال الباشا بنفسه!”
ساد صمت أشد هولاً من كل ما مررنا به.
التفتُّ بسرعة مرعبة نحو كمال الباشا.
كان يمتص نفسًا طويلاً من سيجارته، والدخان ينبعث من فمه ليرسم دوائر رمادية بيننا.
— “أنت…” حشرجت الكلمة في حنجرتي: “أنت اللي بلّغت؟!”
ضحك كمال الباشا بصوت مكتوم، هز كتفيه العريضين.
— “أنا رجل أعمال يا نوال هانم.. ورجل الأعمال الشاطر مبيلعبش على كارت واحد أبداً. أنتِ ذكية أوي في الإدارة والصفقات.. بس لسة خام في لعبة الشارع والدساتس العالية.”
خطا كمال نحو الضابط هشام، وبكل بساطة وضع الفلاشة السوداء في يد الضابط، وأردف:
— “الفلاشة دي عليها كل أدلة إدانة صباح وجمعة في قتل سيد.. أنا جايبهم لكم على طبق من ذهب يا هشام بيه. أما بالنسبة للنوال هانم.. فأنا مبلّغتش عنها بتهمة القتل، أنا بلّغت عنها بصفة إنها ‘الكفيل الضامن’ لشركات سيد، وعشان النيابة تحفظ أصول الشركة وتحطها تحت الحراسة القضائية فوراً، لحد ما تسدد لي الـ 40 مليون.”
اتسعت عيناي من شدة الصدمة.
اللعبة كانت أكبر مني بكثير!
كمال الباشا مكنش عاوز يتفق معايا من الأساس على شراكة أو مهلة سنة.. كمال كان عاوز الشركة تسقط تحت ‘الحراسة القضائية’، لأن الحراسة معناها بيع أصول الشركة، والمخازن، والعقارات في مزاد علني بخسارة شديدة.. وهو الوحيد اللي يقدر يشتري الإمبراطورية دي بـ تراب الفلوس في المزاد!
