صاحبتي ج 1 بقلم اماني سيد
فضلت أقلب وأنا بتنفخ من القهر، لحد ما نزلت شوية تحت وبدأت تظهر الكوارث الأكبر.. صور رومانسية تجمعها هي وجوزي مع بعض! صور ليهم في أوضة نومي واخدين بعض بالحضن وبيبوسها بحب عمري ما شوفته منه السنين دي كلها، صور تانية وهما قاعدين في مطاعم سهرانين، وفي العربية ماسك إيديها وبيضحكوا في منتهى الرومانسية كأنهم عرسان جداد، ونظراته ليها فيها عشق وهي حاضناه بانتصار كأنها بتقول “أنا أخدت منك كل حاجة”.
وسط الصور دي لقيت صورة لوثيقة قلبي اتخلع لما شوفتها.. كبّرت الصورة وأنا إيديا بتترعش، لقيتها قسيمة جواز رسمي عند مأذون! والتاريخ كان صدمة فوق الصدمة.. متجوزها بالظبط تاني يوم ما عدتها من طليقها خلصت! يعني كل قعدتها عندي وتمثيلية “اعتبريني شغالة بلقمتي” والمسكنة دي كلها كانت عشان يستنوا العدة تخلص ويتجوزوا في السر من ورايا، وكل ده بيحصل تحت سقفي وفي بيتي وأنا زي المغفلة مأكلاهم وشارباهم!
نزلت قسيمة الجواز من على الشاشة، وإيديا كانت بتترعش لدرجة إن الموبايل كاد يقع من إيدي. الدموع كانت جافة في عيني من هول الصدمة، والحرارة كانت بتغلي في رأسي. الأنفاس بقت متقطعة، وعقلي مش قادر يستوعب حجم الغدر والخييانة. الإنسانة اللي فتحتلها بيتي، وشاركتها أكلي وشربي، وحميتها في أضعف لحظاتها، كانت بترسم مع الراجل اللي أمّنته على حياتي أحقر سيناريو ممكن يتخيل إنسان.
بصيت عليها وهي نايمة على الكنبة بفعل المنوم، وجهها كان هادي تماماً وكأنها بريئة، لكن الصورة اللي في إيدي كانت بتكشف الشيطانة اللي مستخبية ورا القناع ده. مسكت الموبايل وبدأت أبعت كل الشات، الفواتير، الصور، وقسيمة الجواز على موبايلي. اتأكدت إن كل إثبات بقى معايا، وبعدها مسحت رسائل الواتساب اللي بعتها من عندها عشان متلاحظش حاجة لما تصحى، ورجعت الموبايل مكانه على الترابيزة بنفس الوضعية.
قفلت باب الأوضة عليا، وقعدت في أرضية الأوضة أحاول ألملم شتات نفسي. الفكرة الأولى اللي جت في بالي كانت إنني أصحيهم وأعمل حريقة في البيت، أصرخ وأفضحهم قدام الدنيا كلها. لكن صوت جواه كان بيهمسلي: “لو انفجرتي دلوقتي، هما اللي هيكسبوا. جوزك عارف القايمة وعارف الحقوق وبيحسبها بالقلم والورقة عشان يرميكي بلاش، ولو حس إنك عرفتي هيتصرف بسرعة ويأمن نفسه قانونياً”.
