بقلم روماني مكرم 2
أنا كنت واقفة ساكتة، قلبي بيدق بسرعة. كنت حاسة بوجع شريف وموقفه الصعب، بس في نفس الوقت كنت حاسة بفخر إن جوزي ما اتخلاش عني ولا سمح إن كرامتي وراحتي تتداس تحت مسمى الابتزاز العاطفي.
محمود مسك شنطة السفر وقال بلؤم:
* “يلا يا أمي.. بلاش نتقل على الناس أكتر من كده.”
شريف وقف قدام الباب وجرب يمنعهم:
* “يا أمي استهدي بالله، الدنيا ليلت، هتروحوا فين دلوقتي؟ أقعدوا الليلة وبكره يعمل ربنا ألف خير.”
بس حماتي كانت مجهزة ردها، وزقت شريف من طريقها وبصت لي بنظرة كره مش هنسى أثرها في حياتي، وقالت لشريف بصوت جاف:
* “يا شريف.. لو خرجت من الباب ده النهارده، لا أنت ابني ولا نعرفك تاني، ورجلي مش هتطأ بيتك ده طول ما أنا حية!”
وخرجت حماتي ومعاها محمود، وقفلوا الباب وراهم بقوة هزت المكان.
السكوت حل في الصالة زي المقابر. شريف قعد على الكنبة، حط إيديه على وشه، وظهرت عليه كسرة واضحة. المكان كان مليان بالتوتر والتعب النفسي.
دخلت ياسين أوضته، نيمته وغطيته، ورجعت الصالة. قعدت جنب شريف على الكنبة، وحطيت إيدي على كتفه براحة:
* “شريف.. أنا آسفة. آسفة إن حقي حطك في الموقف الصعب ده.”
شريف رفَع وشه وبصلي، عينيه كانت حمرا ومدمعة:
* “أنتِ ما غلطتيش يا رنا.. أنا عارف إنك صح، وعارف إن محمود وأمي اتصرفوا بطريقة تضغط عليا وتلغي وجودي في بيتي. بس أمي.. أمي خرجت وهي زعلانة مني يا رنا، ودي حاجة حاسس إنها بتدبحني من جوه.”
مسكت إيده وقولت بثبات:
* “أنا مقدرة وجعك يا حبيبي، وعارفة قد إيه أنت ابن بار. أمك زعلانة دلوقتي عشان الصدمة، وعشان كانت متوقعة إنك هتنفذ اللي هي عايزاه بدون تفكير. بس لما تهدى، هتفهم إنك ما ظلمتهاش وإنك حميت بيتك وشرفك.”
شريف اتنهد تنهيدة طويلة وقال:
* “أنا مش هسيبهم ينزلوا في الشارع في الوقت ده يا رنا.. أنا هقوم أصل وراهم من بعيد، أشوفهم رايحين فين وأطمن عليهم.”
شريف قام نزل ورى أمه وأخوه من غير ما يحسسهم، وعرف إنهم أجروا أوضة في لوكاندة قريبة من المحطة عشان يباتوا فيها ويرجعوا البلد الصبح. لما طمن إنهم في مكان أمان، رجع البيت، بس الحزن كان مخيم على وشه طوال الليل.
مرت الأيام الخمسة اللي بعد الواقعه دي كأنها سنين. شريف كان بيكلم أمه كل يوم، بس هي كانت بترفض ترد عليه، أو تخلي محمود يرد ويقول إنها تعبانة ومش عايزة تتكلم معاه. التوتر بدأ يتسرب لحياتنا الهادية، وشريف بقى مشوش وشارد الذهن دايماً.
